На 28 март 2019 година (четврток) во 13.00 часот во изложбениот салон на Општинската установа Музеј на град Неготино се поставени ранохристијанските керамички релјефи од Виничкото кале во соработка со локалниот археолошки и историски музеј “Теракота“ од Виница. Изложбата е составена од 12 теракотни икони и 8 банери на кои се претставени Виничкото кале и 14 мотиви од теракотните икони. Познатите винички теракотни икони, кои се со потекло од 5 до 7 век од нашата ера, се вбројуваат во редот на најавтентичните археолошки откритија и претставуват драгоцен дел од целокупното Христијанско уметничко наследство. Рустични по начинот на изведбата, автентични во иконографската програма и концизни во содржаната порака, виничките тракотни икони претставуваат сведоштво на високите уметнички дострели на древно христијанската уметност создавана во мугрите на средниот век. Теракотните икони поради својата важност и специфичност досега се презентирани на повеќе светски изложби (Австралија, Германија, Словенија, Бугарија, Холандија, Турција, Португалија, Хрватска, Австрија, Русија, Франција и др). Тие се дел од културното богатство на Македонија и како такви имаат непроценливо значење. 
За непроценливото значење на теракотните икони од Виничкото Кале, говореа Јулијана Иванова, виш кустос и директор на музеј “Теракота“-Виница и Благица Стојанова, виш кустос-археолог од истоимената институција. Вниманието на посетителите на изложбата, беше задржано со интересната презентација од страна на Благица, а настанот од областа на културата беше збогатен со преубавата изведба на клавир од страна на учениците од ООМУ “Владимир Арсовски“ од Неготино, Ивана Зафирова (пијано), Илија Богоев (вилина) и студентката и идниот голем пијанист од Неготино, Стефанија Тегова.
Изложбата во Музеј на град Неготино ќе биде поставена до 15 април 2019 година!