Концерт на ПИЈАНО ТРИО во состав
Весна Ангелова Христов-пијано, Момчило Куфојанакис-виолина и Марјан Ивановски-виолончело. во изложбениот салон на Музеј на град Неготино по повод одбележување 250 години од раѓањето на Лудвиг Ван Бетовен. Програма: Л.В.БЕТОВЕН БАГАТЕЛИ оп.119 (избор) Л.В.Бетовен ПИЈАНО ТРИО оп.1. бр.1 Allegro Adagio Cantabile Scherzo-Allegro Assai Finale-Presto Циклусите Багатели иако мал дел од неговиот опус претставуваат своевиден лирски дневник на овој автор. Багатела претставува мала инструментална пиеса. За прв пат називот е искористен за циклус пиеси на Ф. Купрен. Багателата како вид на лирска пиеса е особено развиена од Лудвиг Ван Бетовен.
Бетовен Лудвиг Ван (1770-1827)-германски композитор и пијанист (од таткова страна со фламанско потекло), творец чие дело претставува еден од врвовите на човечкиот дух. Во музичката историја го одбележува зрелото време на „виенска класика“ воедно назначувајќи го и патот на романтизмот. Неговиот талент се пројавил од најрана возраст: на дванаесет години веќе бил заменик на својот учител Кристијан Нефе како оргулист, а од тринаесетата година постојан член на музичката капела во Бон. Неговите естетски погледи се формирале под влијание на Моцарт и Хајдн, но и под силно влијание на просветителството. Животниот пат и творештвото на овој голем композитор биле определени и од податокот - единствен во историјата на музиката - од 1801 постепено оглувувал, се повеќе определувајќи се за живот на самотник. Бетовен е единствениот во историјата на музиката што создавал врвни дела следејќи го своето внатрешно уво. Создавал во повеќе родови но е главно инструментален композитор, автор на ненадминат опус со определувачко значење за натамошниот историски развој во три области: пијано сонатите (32), гудачките квартети (16) и симфониите (9). Последниот став на Деветата Симфонија, популарната „Ода на радоста“ со порака кон човештвото за космичка љубов, денес е официјална химна на Европската унија.
Концертот беше одржан според протоколот за заштита од КОВИД-19